Коргоо министри генерал-майор Руслан Мукамбетов Кыргыз Республикасынын төрагалыгы алдында өтүп жаткан ЖККУга мүчө мамлекеттердин отурумуна катышты

2025–жылдын 27-ноябрында Кыргыз Республикасынын Коргоо министри генерал-майор Руслан Мукамбетов Кыргыз Республикасынын төрагалыгы алдында ЖККУга мүчө мамлекеттердин тышкы иштер министрлер кеңешинин, Коргоо министрлер кеңешинин жана коопсуздук кеңештеринин катчылар комитетинин отурумуна катышты.

Отурумдун жүрүшүндө катышуучулар аймактык коопсуздукту бекемдөө, жамааттык коргонуу механизмдеринин натыйжалуулугун жогорулатуу жана ЖККУга мүчө мамлекеттердин тышкы саясий аракеттерин координациялоо маселелерин талкуулашты. 

Ошондой эле, улуттук коркунучтарга, анын ичинде терроризмге каршы аракеттенүү чараларына, ошондой эле күч түзүмдөрүнүн жана коргоо ведомстволорунун өз ара аракеттенүүсүнүн стратегиялык багыттарына өзгөчө көңүл бурулду.

Талкуунун жыйынтыгында Жамааттык коопсуздук механизмдерин мындан ары өнүктүрүүгө багытталган документтердин пакети макулдашылды, анын ичинде 2026-2030-жылдарга аскердик кызматташтыкты өнүктүрүү планы кабыл алынды. 

Талкуулардын жыйынтыгы боюнча Тараптар жамааттык коопсуздукту мындан ары бекемдөөгө жана уюмга мүчө мамлекеттердин өз ара аракеттенүүсүнүн натыйжалуулугун жогорулатууга багытталган бир катар макулдашууларга жетишишти.